۱”خبردار بوْلېݩ، یاغشې ايشلريݩيزي انسانلارا گؤرکازمک اۆچين اوْلارېݩ گؤزينيݩ آلېندا اتمأݩ. بۉرقم اتسأݩيز، آسمانداقې آتاݩېزدان سېلاغ آلمارسېݩېز. ۲شوْنېݩ اۆچين هم محتاجا صدقه برانيݩيزده، جار اتمأݩ. انسانلار اوْلارې ماختاماق اۆچين، ايکي‌یۆزليلر کنيسالرده، کؤچالرده شۉرقم ادیوْرلار. سيزه دوْغرۉسېنې آیدیوْرېن : اوْلار شوْپيلأ اؤز سېلاغېنې آلاندېرلار. ۳سيز صدقه برانيݩيزده، ساغ اليݩيزيݩ نأمه ادیوْنېنې چپ اليݩيز بيلماسين. ۴شۉنېݩ اۆچين، بریوْن صدقاݩېز گيزلي بوْلسېن. گيزلينليکده اديلاني گؤریوْن آتاݩېز سيزيݩ سېلاغېݩېزې برار.
(
۵دعا-ديلاگ ادانيݩيزده، ايکي‌یۆزليلر یانې بوْلماݩ. مردم اوْلارې گؤرار یانې، کنيسالرده، کؤچالريݩ بۉرچاقلارېندا دۉرېپ، دعا-ديلاگ اتمأنيني حالایوْرلار. سيزه دوْغرۉسېنې آیدیوْرېن، اوْلار شوْپيلأ اؤز سېلاغېنې آلاندېرلار. ۶اما سيز دعا-ديلاگ ادانيݩيزده، اؤز اۆیيݩيزه گيريپ، ايشيگي یاپېݩ-هم، گؤرينمیوْن آتاݩېزا گيزليليکده دعا اديݩ. گيزلينليکده اديلاني گؤریوْن آتاݩېز سيزيݩ سېلاغېݩېزې برار. ۷دعا-ديلاگ ادانيݩيزده، بی‌گانه ملتلر یانې، معناسېز سؤزلري غایتالاپ دۉرماݩ. اوْلار کؤپ گپلامک بيلان دعاسې قبۉل بوْلار ديییوْرلار. ۸اوْلار یانې بوْلماݩ. آتاݩېز سيزه نأمه گراکليگيني دعا اديلمزدن اوّل بيلیوْر. ۹شوْنېݩ اۆچين، شۉرقم دعا-ديلاگ اديݩ :
’ای، آسمانداقې آتامېز!
آدېݩ مقدس بوْلسېن!
۱۰پادشالېغېݩ گلسين!
آسماندا بوْلېشې یانې،
یرده-هم سنيݩ ايسلأنيݩ عمله آشسېن!
۱۱گۆنداليک نانېمېزې بيزلره شۉ گۆن بر.
۱۲بيزه یامانلېق ادیوْنلارې باغېشلایېشېمېز یانې،
سن هم بيزيݩ گنالارېمېزې باغېشلا.
۱۳بيزي سېناغا سالما، ترسينه بيزي شیطانېݩ اليننن غوْرې.‘
۱۴باشغالارېݩ سيزه ادان خطالارېنې باغېشلاساݩېز، آسمانداقې آتاݩېز هم سيزيݩ ادان خطالارېݩېزې باغېشلار. ۱۵اما سيز اوْلارېݩ خطالارېنې باغېشلاماساݩېز، آتاݩېز هم سيزيݩ خطالارېݩېزې باغېشلاماز.۱۶روْزه تۉتانېݩېزدا، ايکي‌یۆزليلر یانې یۆزيݩيزي ساللاماݩ. اوْلار باشغالارا آغزېݩ روْزالېغېنې گؤرکازجک بوْلېپ، یۆزلريني ترشېدیوْرلار. سيزه دوْغرۉسېنې آیدیوْرېن، اوْلار شوْپيلأ اؤز سېلاغېنې آلاندېرلار. ۱۷اما سيز روْزه تۉتانېݩېزدا، ساچېݩېزې یاغلاپ، داراپ، یۆزيݩيزي یۉوېݩ. ۱۸شوْندا سيزيݩ روْزه تۉتیوْنلېغېݩېز انسانلار دأل-هم، فقط گيزلين آتاݩېز بيلار. گيزليليکده اديلاني گؤریوْن آتاݩېز سيزيݩ سېلاغېݩېزې برار.
(
۱۹بۉ دنیادا اؤزيݩيزه خزينه جمعلامأݩ. بۉ یرده اوْنې گۆیه ايییوْندېر، زݩلایوْندېر، یا هم اوْغرۉلار گيريپ اوْنې اوْغرۉلایوْندېر. ۲۰شۉنېݩ اۆچين اؤزيݩيزه آسماندا خزينه جمعلأݩ. اوْل یرده گۆیه ايیمز، زݩلامز، اوْغرۉلار گيريپ اوْغرۉلاماز. ۲۱مالېݩېز نيراده بوْلسا، یۆراگيݩيز هم شوْل یرده بوْلار.
۲۲بدنيݩ چېراسې گؤزدير. گؤزيݩ ساغ بوْلسا، همه بدنيݩ هم یاختېلېق بوْلار. ۲۳گؤزيݩ اگر ساغ بوْلماسا، همه بدنيݩ هم غاراݩقې بوْلار. اگر سندأکي اېشېق غاراݩقې بوْلسا، اوْندا اوْل نأهيلي بير کتته غاراݩقېلېقدېر!
۲۴هيچ کيم ايکي اربابا خدمت اديپ بيلمز. اوْل یا بيرينجيني یک گؤريپ، ايکينجيني یاغشې گؤرار، یا ايکينجأ وفالې بوْلېپ، بيرينجيني کيژژيک گؤرار. سيز هم خۉدایا، هم بایلېغا خدمت اديپ بيلمارسيݩيز.
(
۲۵شوْݩا وره سيزه ديییوْرېن : نأمه ايیيپ-ايچارين ديیيپ جانېݩېزې غایغې اتمأݩ. اگنيݩيزه، نأمه گیارين ديیيپ بدنيݩيزي غایغې اتمأݩ. جان ايیمکدن، بدن کؤیناکدن ضرۉر دألميدير؟ ۲۶آسمانداقې غۉشلارا غاراݩ، اوْلار نه اکیوْرلار، نه اوْریوْرلار، نه-هم انبرلاردا ايیجکلريني توْپلایوْرلار. مۉݩا غارامازدان، آسمانداقې آتاݩېز اوْلارا-هم رزقلارېنې بریوْر. سيز اوْلاردان حاص یوْقارې دألميسيݩيز؟ ۲۷سيزيݩ هایسې بيريݩيز غایغې اديپ، عمريݩيزي بير ساعت اۉزالدېپ بيلیوْرسېݩېز؟ ۲۸نأمه اۆچين اگينباشېݩ آلاداسېنې ادیوْرسېݩېز؟ میدانداقې سۉسان گۆللريݩ نأهيلي اؤسيشينه گؤزلأݩ : اوْلار نه زحمت چکیوْرلار، نه-هم یۆپ اگيریوْرلار. ۲۹اما من سيزه ديییوْرېن، حتّیٰ سلیمان هم اؤزينيݩ همه شان-شهرتينده بۉلارېݩ هيچ بيري یانې گیينمأنتي. ۳۰اما بۉ گۆن بار بوْلېپ، ارتير اوْجاغا تاشلانیوْن میدان اوْتېنې خۉدای شۉرقم گیينديریوْن بوْلسا، سيزي اوْننان حاص سۆشيک گیينديرمزمي، ای، کم ايمانلار؟ ۳۱شوْنېݩ اۆچين نأمه ايیيپ-ايچاريس، نأمه گیاريس ديیيپ آلادا اتمأݩ. ۳۲بۉ زاتلارېݩ بارېنې بی‌گانه ملتلر آختاریوْرلار، اما آسمانداقې آتاݩېز بۉلارېݩ هماسينيݩ سيزه گراکليگيني بيلیوْر. ۳۳سيز بوْلسا اوْزال خۉدایېݩ شالېغېنې و اوْنېݩ دوْغرۉلېغېنې آختارېپ-گؤزلأݩ، شوْندا بۉ زاتلار هم سيزه اوْنېݩ اۆستينه غوْشېلېپ بريلار. ۳۴شوْنېݩ اۆچين ارتأني غایغې اتمأݩ، ارته اؤز غایغېسېنې اؤزي ادار. هر گۆنيݩ غایغې اؤزينه یتار“.